النتائج 1 إلى 1 من 1

الموضوع: نشرة أخبار عم إبراهيم

  1. #1
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,232

    افتراضي نشرة أخبار عم إبراهيم

    عم ابراهيم مش من شهداء الثورة ...ربنا يديله الصحه و طول العمر , و لا أصيب فى المظاهرات و لا حتى نزل يشترك فى المظاهرات و لا الاحتجاجات.. مش علشان انه مش وطنى , لا علشان هو مش فاهم حاجه زى كتير مننا ..و مع ذالك كان لعم اباهيم دور كبير فى الثورة و مازال مستمرا.
    خلينى اعرفكم الأول على عم ابراهيم :
    عم ابراهيم بيشتغل "حارس عقار" _ بواب يعنى _ رجل فى الخمسينات صاحب مرض و عنده كوم لحم ... عم ابراهيم بالرغم من مرضه الى مش عارفه هو ايه _ربنا يشفى كل مريض_ فهو مدخن شره ..اهو حاجه كده بينفخ فيها بدل ما يولع فى نفسه على حد قوله ... ولاد عم ابراهيم فى جميع المراحل التعليميه , و الى اصر على تعليم الاولاد سعاد مراته او ام محمد زى ما بتحب الناس ينادوها.

    عم ابراهيم راجل غلبان و طيب.. بس كسول مبيحبش يروح مشاوير.. و ما يصدق يصدر حد من عياله او يصدر الطرشه .
    هوايات عم ابراهيم مشاهده التليفزيون و قراءة الجرائد , مع انه "امى" لا يجيد القراءة و الكتابة , لكنه كان بيجيب سعاد و يقعدها جنبه تقراله الاخبار ..علشان لما يقعد مع اصحابه علي القهوة يلاقى حاجه يتكلم فيها غير سيره السكان, بس دلوقتى بيقعد محمد ابنه يقراله.. الحكايه دى بتخنق محمد بس مش بيعرف يفلفص من ابوه يا عينى .
    خلينا فى موضوعنا و هو دور عم ابراهيم :
    الحقيقه عم ابراهيم له دور كبير فى الاحداث الى بتحصل من غير ما يتظاهر ولا يعتصم ولا يندد ..كل الى بيعمله عم ابراهيم و اللي اصبح هوايته المفضله هى ترويج الاشاعات !!!!!!!
    يوم من ايام اللجان الشعبية فى بداية الثورة حصل ضرب نار فى الشارع المجاور للعمارة الليى عم ابراهيم الحارس بتاعها , فطلب احد السكان الجالسين تحت من عم ابراهيم انه يروح يشوف ايه الحكايه.. راح عم ابراهيم و هو بيبرطم و يقول " مايقوم حد منهم !!! حاجه تقرف هو العمر بعزقه " و هو فى طريقه خبط فيه واحد كان بيجرى و بيبص وراه الراجل وقع و عم ابراهيم وقع فوقه جات الناس تجرى , قوموا عم ابراهيم ومسكوا الراجل التانى و هاتك يا ضرب ,و هما بيقولوا لعم ابراهيم برافو عليك يا ابراهيم بطل و الله ... و عم ابراهيم مش فاهم حاجه.. بعد فتره مش طويله عم ابراهيم ابتدى يفهم اللي بيحصل ..و بعد ما عجنوا الراجل المأسوف على شبابه اتضح انه ابن احد سكان عمارة فى نفس الشارع ... اتعرف على باقى ملامحه الى اتلخبطت من الضرب احد الماره ... رجع عم ابراهيم و هو مترب من الوقعه... قامت الرجاله يسألوا ابراهيم ايه الى حصل ؟ ..و ابتدى ابراهيم يحكى" لا ابدا شويه بلطجيه كده و ربناهم ..سبتهم للناس علشان يسلموهم للجيش و جيت اطمنكم"قعد عم ابراهيم يحكى عن بطولته فى القبض على البلطجى الى مكنش بلطجى اصلا ...الحكايه كبرت و قعد عم ابراهيم يحكى , و تانى يوم الناس الى فى الشارع و الشوارع المجاوره كانت بتحكى عن البلطجيه الى مسكهم عم ابراهيم و بارزهم بالسيوف و لا صلاح الدين الايوبى فى زمانه.
    يوم بعد يوم الاعداد تزيد و البطولات تكتر و الاستاذ مصطفى اللي فى الدور الثالث يحكى لصاحبه انه امبارح بمساعدة عم ابراهيم قبضوا على 63 بلطجى ,و يجرى الاستاذ صلاح يحكى لمراته ان ازاي مصطفى صاحبه ضرب 86 بلطجى بالرصاص المطاطى و الرصاص الحى و القنابل المسيلة للدموع ,و وقعهم كلهم ما بين جريح و قتيل .
    مين يسمع الكلام ده... عمر ابن الاستاذ صلاح الى بدوره ينشر الخبر على الفيس بوك و ياكد ان الخبر صحيح و موثوق فيه و عاجل و هام و خطير و مميت ... المصدر مين؟؟!! عم ابراهيم
    و بقت هوايه عم ابراهيم ترويج الاشاعات يروح السوق و يرجع الست منال تسأله "ايه يا عم ابراهيم ده مجبتش باقى الطلبات ليه؟؟ " فيرد يقولها "اسكتى يا مدام دي الدنيا مولعة فى السوق ضرب نار و سرقه فجبت الحاجات دى بسرعه و جيت ده حتى و انا جاي وقعت فالطماطم اتفعصت"و هو اصلا كسل يدخل السوق جوه يجيب من عم فاروق الخضري و جاب من عند الواد فتحي.. مع ان الطماطم بتاعته مفعصه ..و الست منال عايزها جامدة ..بس الست مفتحتش بقها علشان موضوع البلطجيه ده .
    قفلت الباب و جري على التليفون كلمت اختها : شوفتى يا سحر فى ضرب نار فى السوق و الجيش جه و دخل بالدبابات فى السوق
    ترد اختها : معقول الدبابات حتدخل السوق؟؟!!!
    منال: اه والله الصوت واصل لحد هنا مش سمعاه ؟! ثم عم ابراهيم جاب لي الطماطم مفعصه ....سحر:الطماطم مفعصه؟؟؟!!!! يبقى الخبر صحيح ... عارفه لو كان جاب الطماطم جامده كنت قلتلك كداب ... اقفلي اقفلي اما الحق اكتب الخبر على الفيس بوك علشان الناس تاخذ بالها.
    و تدخل سحر و تكتب عن مذبحه القلعه الى حصلت فى السوق و ازاى ان فى جرحى و قتلى و ستات اغتصبت و اطفال اتخطفت و فجاة السوق بقى ولا العراق .... و يفضل الخبر ينتشر و يكبر لحد ما نسمع ان اسرائيل على الحدود و طائرات امريكيه فى الجو و قنابل نوويه فى الاسكندريه و البحيره و شمال سيناء و المصدر ايه "عم ابراهيم "_ جعله الله ذخرا للوطن _و الناس تعيش فى هلع و رعب وكل ده علشان عم ابراهيم كسل يدخل السوق من جوه علشان يجيب لمدام منال الطلبات الى عايزاها .

    من كام يوم مدام منال بعتته يجيب كوسة.. اصل استاذ علاء جوزها كان نفسه في محشي كوسة ... وفي الطريق للسوق عم ابراهيم قابل الاسطي حسن السباك ..

    الاسطي حسن :" ايه يا ابراهيم علي فين ؟؟
    "
    عم ابراهيم :" رايح السوق اجيب طلب .. سكان هَم مبيبطلوش طلبات .
    "
    الاسطي حسن: " يا عم سيبك منهم تعالي نشرب اتنين شاى على القهوة و ابقي روح بعدين .. ده حتي الواد حمو الكهربائي قاعد مستنينى هناك و كان لسه بسال عليك
    "
    عم ابراهيم: "و الطلبات ؟؟؟ "
    الاسطي حسن: " ابقى جيبها بعدين هي يعنى الدنيا حطير "
    عم ابراهيم قعد قعدته و الوقت سرقه راح علي السوق ملقاش الحاجات الي مدام منال طلبتها ... رجع علي البيت و هو بيفكر حيقول لمدام منال .. و هو ماشي سمع اتنين بيتكلموا ان قنبلة انفجرت في احد قري المنيا و ان في واحد مات و تلاته انصابوا ... عم ابراهيم قال بس مابدهاش انا اقول للمدام ان كان في قنبله في الترام .
    طلع عم ابراهيم علي السلالم جري.. و لما وصل لشقه مدام منال في التالت كان بيشحر .. فتحتله مدام منال الباب و اتخضت من منظره .. عرقان و مش قادر ياخد نفسه ..
    مدام منال :" في ايه يا عم ابراهيم مالك عامل كده ليه "؟؟؟
    عم ابراهيم يلتقط انفاسه :" اسكتي يا مدام ده انا اتكتبلي عمر جديد ... بعد ما خلصت الطلبات واقف اخد الترام ... بعيد عنك لقيت نفسي باطير و دب رحت واقع علي الارض ... و حواليا دخان و ناس بتصوت و ستات بتجري.. و جتت بعيد عنك بتقع عليا ..و ايد طايره شمال و رجل طايره يمين ... حسبي الله و نعم الوكيل دول عايزين يخلصونا يا مدام ... اخدوني علي القسم علشان اشهد و لسه راجع اهو ".

    منال: " لا حول و لا قوه الا بالله معلش يا عم ابراهيم الف سلامه عليك
    "
    نطت فطت مسكت منال تليفونها و راحت مكلمه نهى صاحبتها :" نهي الاولاد فين ؟؟
    "
    نهي " الاولاد في النادي خير ؟؟
    "
    منال " كلميهم يجوا علي البيت فورا جالي خبر من مصدر موثوق فيه من امن الدوله ان في مجموعه داعشيه زرعت سلسله من القنابل النوويه الهولاميه تستهدف الاطفال ما بين سن السنه الي 15 سنه
    "
    نهي " هو تطعيم يا منال ؟؟!!! انتي جبتي الكلام ده منين ؟؟
    "
    منال " انتي حره انا عن نفسي بعت اجيب الاولاد من عند ماما
    "
    نهي قلبت الكلام في دماغها و قالت لنفسها من خاف سلم .. كلمت اولادها و جابتهم من النادي علي ملا وشهم ... و نشرت الخبر علي صفحه النادي علشان تحذر باقي الامهات.. و صفحه النادي بدورها حذرت الاعضاء و التليفونات اشتغلت تليفونات علي رسايل و قامت الدنيا و مقعدتش ... و المصدر مين "عم ابراهيم
    "
    و يوم وراء يوم مفيش خبر يفتح النفس و كله خطير و هام و موثوق بيه و المصدر مين "عم ابراهيم"
    على فكرة هومافيش عم ابراهيم ولا حاجة .... احنا كلنا عم ابراهيم لان ده الى كلنا بنعمله من ساعه قيام الثورة ليومنا هذا


    منقول من الفيسبوك
    التعديل الأخير تم بواسطة عفاف ; 03-08-2016 الساعة 10:28 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •