صفحة 2 من 2 الأولىالأولى 12
النتائج 11 إلى 14 من 14

الموضوع: 28 يناير 2011 أسوأ يوم في تاريخ مصر

  1. #11
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,208

    افتراضي


    ربيع الحسينى

    الحمير لا يدخلون الجنه
    يوم القيامه يأتى الله بكل المخلوقات عدا الانسان .. ويفتح لهم وادى يدخلون فيه ويصيرون ترابا...يوم يقول الانسان ياليتنى كنت ترابا .. فهم معافون من الحساب الربانى.. لان الله لم يضع فيهم العقل الا فيما يستطيعون العيش به .. هذه حدود تفكيرهم .. اما الانسان فخلق الله له العقل ليميز الخبيث من الطيب والخير من الشر والحلال والحرام .. فحق عليه الحساب
    انا مش مباركى ولا عمرى حبيت سياسات مبارك .. ولكن كنت زى ملايين المواطنين . اللى بيتفرجوا على الثوره من خلال قناة الجزيره .. يومين متابعه لما يحدث مفيش نوم .. ولا حتى اكل الا شاى وسجاير .. كان المطلوب خروج مبارك على الناس يتكلم .. وخرج اتكلم وطلب انه يسلم السلطه ف موعدها بعد كام شهر والا الفوضى الخلاقه .ووعد بالاصلاحات .. نعم كان يعلم بهذه الفوضى قبل ان تبدأ من 2007 اجهزه المخابرات تضع امامه كل السيناريوهات .. لم يفهمه احد .. وخرجوا يقولون ان مبارك بيهد]نا ( انا او الفوضى ) او هذا ما اصر اضلاع المؤامره افهامه للناس.. وتقريبا بدأ الميدان يفضى من شاغليه .. او من المحترمين من المصريين .. او الواعيين لما يحاك .. وبكينا مع خطاب مبارك تاثرا ..ليس من اجله .. ولكن لإهانة الهيبه والشيبه عندما رفعوا الحذاء ف الميدان .. فهذه ليست اخلاق المصريين .. وتحدث بعد الخطاب بساعات قليله ما اسموه بموقعه الجمل .. طيب لو ده عمل من اعمال ابناء مبارك او الفلول .. ايه يجبر مبارك يقول خطاب ؟؟ لو فى نيته ضرب المتظاهرين على الاقل هيأجل الخطاب لحد ما يشوف النتيجه .. وخاصه ان لغة الخطاب لم تكن تحمل اى اهانه او وعيد للمتظاهرين .. فمن قام بهذا ؟؟ وما الهدف ... ؟؟ نعم الهدف كان نااوو . اذ.. ناااو .. معقول اشرب علبه سجاير كامله فى تلات ساعات ؟؟ ده ايه التوتر ده؟ ... تليفونات ارضى شغاله بينى وبين عائلتى .. كلها تدور حول ماذا بعد ؟؟ وكل منهم يدلو بدلوه .. كل ما استطعت ان انصح به .. اقفلوا الباب على نفسكم كويس .. ومفيش حل الا مية النار حطوها ورا الباب .. محدش يضمن هايحصل ايه للناس ف البيوت ..محدش يخرج من البيت .. دى كانت نصايحى اللى انا معملتش بيها .. والاقى الهجوم على الشرطه من اعنف ما يكون .. الرجاله بتهرب وكان لازم تهرب .. لان اللى بيتمسك من الداخليه بيقتلوه .. مش المتظاهرين اللى بيقتلوا .. لا فيه ناس موجوده قاصده تقتل .. كله من عسكرى لظابط قلع هدومه الميرى .. واتخلص من الكارنيه بتاعه .. ومشى ف الشارع بيترجى ربه يوصل البيت سليم .. واختفى الامن من الشوارع .. كان لازم انزل .. لبست هدومى ووقفت قدام نفسى .. ادى لنفسى تعليمات .. انى ما اقفش فى الطريق لاى حد مهما كانت الاسباب .. اللى يقرب منك طرشق دماغه بطلقه .. وكمل سيرك .. متحاولش تقف .. تدافع عن حد او تحوش عن حد .. لان لعبه الحراميه افتعال مشاجره تدخل بينهم يقلبوك .. واتعملت اللجان الشعبيه فى خلال ساعات .. كان معايا عربيه وقتها .. ونزلت اخدت طريق البحر.. الطريق فااااضى تماما .. وناس واقفه بحجاره يضربوا العربيات لوموقفتش بالحجاره ف القزاز .. كنت بجرى بالعربيه وبفادى اى ضربات بالحجاره .. وعندى استعداد لو حد وقف قدام العربيه انى اشيله من على وش الارض .. ياروح ما بعدك روح .. وخاصة انى سمعت صوت ضرب النار ف الشوارع بكثافه ..طب من مين الشرطه مش موجوده ..؟؟ العيال والشباب بيجروا ف الشوارع معاهم سلاح .. من كل ما تتخيله من انواع .. سيوف وسكاكين ومسدسات وبنادق وبنادق خرطوش ..كنت وصلت لحد اول طريق قناه السويس ولقيت تجمعات عند قسم باب شرقى .. طبعا تصورى ان اهالى المحبوسين رايحه تخرجهم .. وكملت لحد ما طلعت على الطريق السريع .. السما مليانه دخان يخنق .. ومنوره نور احمر .. فيه حرايق شغاله بس فين؟؟ ومن هنا بدأت اتفرج .. على ناس شايله ملايات .. اه والله العظيم ملايات زى البؤجه .. مش قادر يشيلها .. فيه ايه ؟؟ قالوا كارفور بيتسرق .. والاغرب تلاقى واحد عند النافوره تحت كوبرى محرم بك .. بيفك الحنفيه بتاعة النافوره الكبيره .. بمفتاح انجليزى اطول منى .. قربت من كارفور .. لقت عربيات نص نقل بتحمل مسروقات .. رجاله وستات كبار ف السن بيترجوا رضا ربنا بيسرقوا .تلفزيونات وتلاجات وغسالات ودهب وماس وكل ما تتخيله .. حتى الحراميه كانوا قاعدين على الارض بيوفقوا الاحذيه اللى سرقوها مع بعض ... محدش ف الشارع الا الحراميه .. لو وقفت لحظه هاتثبت .. لفيت وجيت راجع .. مريت من شارع الرصافه .. سمعت صوت اطلاق النار بكثافه .. الضرب كان من بره قسم محرم بك .. السور عالى وناس بتحاول تقتحم السور .. وبيتضرب عليهم نار .. مشيت شويه لقيت ناس ماسكين راجل كبير صول شرطه ومطحون ضرب .. لدرجه انى سمعت واحد بيصرخ بيقول : حرام عليكم الراجل مات ... بتضربوا ف ميت؟ رجعت مطرح ما جيت وقفت قدام قسم باب شرقى .. لقيت ناس كتير متجمعه .. وهذه شهاده امام الله .. هيسالنى عليها ربنا يوم القيامه .. اللى واقفين بتوع الدعوه السلفيه الدقن الطويله والجلابيه القصيره ومعاهم الاخوان. والقسم مولع .. فيه ايه يا جماعه .. يترد عليا بانها نهاية الطغاه... طغاة؟؟؟ احنا بقينا ف حرب حقيقيه ... ولقيت اللى بيقولى اطلع يا استاذ .. ف الحالات دى .. الشجاعه مش مطلوبه لان العدد كبير.. لفيت اسكندريه كلها .. مفيش ولا قسم الا وهو مولع .. طب التوقيت كله ف وقت واحد مين اعطى التعليمات بده ؟؟ ماهو لازم دى خطه .. دى مش فعل عادى .. الصراخ طالع من كل العمارات .. لان البلطجيه طلعوا البيوت .. وكل راجل يدافع عن بيته .. ورجعت ماسك البحر تانى .. والغريب رغم ان مفيش عربيات ماشيه كتير انما اللجان الشعبيه فى كل مكان .. كلهم ماسكين شوم .. لو انا فى حى هاقف لكن ع البحر لا .. وكنت كل ما اقرب من لجنه ادخل فيهم بالعربيه باقصى سرعه يبعدوا كلهم ويفتحوا الطريق .. وعرفت بعد كده انهم لجان بلطجيه .. لان مش معقول تبقى اللجنه واقفه وجنبهم ناس بتكسر ف المحلات .. وصلت البيت .. من على باب العماره لقيت بتوع الامن .. متسلحين لاول مره .. جانبى منطقه عسكريه .. مش هاقول مكانها .. وبلغنى بتوع الامن ان الجيش فوق السطح .. من غير ما افكر عرفت انه حمايه للوحده العسكريه اللى جنبنا .. طلعت فوق السطح الدور الخامس عشر .. وقفت مع الرجاله .. ولقيت اسكندريه كلها مولعه والنار طالعه من كل مكان .. والسما سوده من الدخان..ومنوره من النار .. مكنتش سامع من الرجاله غير جمله ( ربنا يستر) .. وبدأت اشوف المدرعات بتاعة الجيش تتحرك ف الشوارع .. حسيت بشىء من الاطمئنان .. ونزلت اتابع من الجزيره .. لقيت اقتحام للسجون كمان .. وقتها بس عرفت انها مش ثوره .. وسمعت الحقير محمد مرسى بيتكلم ف الجزيره ..لحد ما فوجئت ان المسجون محمد مرسى اصبح رئيسا للجمهوريه .. وكل ما بين اقتحام السجون لحد وصول محمد مرسى للقصر كلنا عارفينه .. وبرضه اللى حصل ف جمعه الغضب او الجمعه السوداء كلنا عارفينه.. وشفتوه زى ما انا شوفته .. متقوليش الحمد لله ان لولا الثوره مكناش عرفنا لااخوان .. لان اسلوب الاخوان معروف من سنه 28 لو مقدرش يوصل للى عايزه بيحرق وبيفجر .. ومن ايام الملكيه وهو بيحرق ويفجر .. واللى ميعرفش يروح يدور فى جوجل واليوتيوب ..ولو سمحت متقوليش احنا عملنا ثوره .. قول احنا اتعمل بينا ثوره .. صحيح لك طلبات مشروعه كمواطن .. ولكن؟؟ مش عشان واحد يمشى .. اقتل فى جيش وشرطه ومواطنين واحرق البلد اللى اتبنت اصلا بفلوس المصريين .. وسؤال .. هل حققت ما اردت ؟؟ ام لازلت تدفع ثمن الانهيار الامنى والاقتصادى .. وضياع الدوله ؟؟ عفوا عزيزى المواطن .. الحمير لا يدخلون الجنه

    التعديل الأخير تم بواسطة عفاف ; 29-01-2017 الساعة 01:19 PM

  2. #12
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,208

    افتراضي




    Henoo Henoo
    28 يناير 2011 كنت جاية من برة اول ما وصلت لمطار القاهرة حسيت بشيء غريب الوضع مش مضبوط الاتصالات مقطوعة اللي في المطار بيحكي أن فيه حظر تجول والجيش نزل الشارع اللي في المطار خايفين سواء ناس أو أمن وسمعت كلام عن حرق أقسام الشرطة .. خرجنا من المطار ما لقينا حد جاي يأخذنا ولا تاكسيات في الاخر لقينا عربية بيجو قال مش ممكن يروح أكتوبر ساعتها قلت له خد الفلوس اللي انت عاوزها فطلب 500 جنيه قلت مش مشكلة وكمان خد معاه قدام واحد أجنبي كان رايح الزمالك .
    وهنا ابتدت المأساة اول ما دخل صلاح سالم من عند الكليه الحربية لقيت أنوار الشوارع مطفية ومفيش حركة في الشوارع خالص وعند بيت الريس في العروبة كانت الطرق مغلقة من جانب الحرس الجمهوري قعد يلف حوالي ساعة في مصر الجديدة بدون جدوى وساعتها سمعنا ان مبارك هرب خارج مصر .. المهم وصل بعد عناء لكوبري أكتوبر واحنا علي الكوبري شفت عربيات للجيش والناس بتهلل ليها تقريبا كانت متجهة جهة التليفزيون المصري .. وبعدين لما وصلنا فوق قسم الازبكيه توقفنا وشفت بعيني القسم وهو بيولع ويخرجون المساجين عن طريق هدم جدار القسم جهة كوبري أكتوبر .
    بعدين مرينا علي ميدان عبد المنعم رياض ساعتها شميت ريحة دخان وحرق لكواتش العربيات والأنوار في النيل مطفية ساعتها بكيت وخفت علي البلد وكنت مذهولة من الصدمة وبعدين خدنا اتجاه الزمالك ومنها لجامعة الدول العربية بالمهندسين ساعتها واحنا نازلين من الكوبري شفت البلطجيه قافلين منزل الكوبري وبيعدو عربية عربية المهم وفي أيديهم مختلف أنواع الأسلحة من بيضاء وجنازير وشوم.. بس لحسن الحظ ساعتها كان فيه هيصة تحت الكوبري فجريوا هما باتجاه الهيصة ساعتها العربيات والتاكسي اللي كنت فيه جريوا بأقصى سرعة وكملنا لاكتوبر بعد ما كنتش مصدقة نفسي أن ممكن اوصل كل الرحلة دي من المطار للبيت خدت 4 ساعات في قلق ورعب من 7 م حتي 11 م والله العظيم انا ساعتها كان كل خوفي علي مصر اكتر من خوفي علي نفسي( الله خير حافظ )
    وبعد ما وصلت تابعت الااخبار في TV من هروب الشرطة والسرقات والبلطجة واللجان الشعبية ( البلطجية ) وبعدين سيطرة الجيش علي الوضع المرعب ده وحظر تجوال ... ساعتها بديت اطمن أن البلد بقت في ايد أمينة..
    الحمد للله علي نعمة الجيش المصري دائما وابدااااا .
    اللي حصل ده ما كانش ولا عمره هيكون ثورة دي كانت مؤامرة مكتملة الأركان .
    ومع الايام اكتشف المصريين تعرضهم لأكبر خديعة تحت مسمي عيش حرية عدالة اجتماعية ..
    ربنا يحفظ مصر .....
    شاهدة علي يوم 28 يناير 2011 جمعة إسقاط مصر وليست جمعة الغضب .



  3. #13
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,208

    افتراضي




    Abeer El-Ghawaby
    كنت عايزة انزل الثورة من اول يوم بس يوم ٢٥ رحت بالعربية لحد ميدان التحرير ورجعت على طول
    يوم ٢٨ بأه اول يوم انزل بجد
    نزلت لوحدي خالص ورحت على مسيرة هتبتدي من رابعة .😂 عشان اقرب حاجة للبيت

    اتحركت المسيرة ومشينا في يوسف عباس وفضلنا ماشيين وينضم علينا مسيرات لحد ما وصلنا رمسيس
    يومها التليفونات قطعت وماعرفتش اكلم حد غير امنية على التليفون الارضي اللي نزلتهولنا ست من شقتها اللي في الدور الارضي وكنا واقفين طوابير عشان نتكلم نطمن اهالينا وقلت لامنية تطمن ماما اني كويسة وجريت احصل المسيرة اللي كانت سبقتني وبمجرد وصولنا رمسيس مشي ..😂 لقينا عربيات الشرطة بتحدف علينا غاز مسيل للدموع ولقيت الناس بتقول نحط كوكاكولا على عنينا واللي يوزع علينا ماسكات وعربيات الشرطة كل ما تقرب منا يحدفوا عليها طوب والدنيا اخر لخبطة والميدان اتقفل علينا لمدة ساعتين مش عارفين نكمل في اتجاه التحرير في الوقت دة اتعرفت على مجموعة بنات وكنا ماشيين سوا ورحنا اكلنا كشري من محل في رمسيس وفجأه لقينا الناس بتهيص بنبص فوق الكوبري لقينا دبابات الجيش ماشية فوق الكوبري والناس بتهلل وتقول الجيش نزل .🙌🏻
    بعدها لقينا السكة اتفتحت وبدأنا نتحرك في شوارع وسط البلد في اتجاه التحرير
    شفت في الوقت دة حاجات عجيبة 😳😳
    عربيات شرطة بتتحرق ادامنا وبنعدي من جنبها عشان نروح عالتحرير ومكن البنوك اللي في الشوارع متكسر والمحلات ازازها متكسر .. يظهر دي محاولات سرقة !!
    حسيت وقتها بخضة كدة ومافهمتش ليه الناس بتعمل كدة في وقت زي دة ؟
    وصلنا التحرير وفضلنا تحت عمارة هناك والدنيا ضلمت واحنا قاعدين
    شوية وسمعنا ضرب نار وناس بتتصاب وليزر في الهوا من فوق السطوح وجو رعب وموت وريحة تراب وغازات مسيلة للدموع
    ابتدوا ناس يقولولنا يفضل ان الستات تمشي عشان فيه خطورة .. فكرت بعد شوية ولقيت اني فعلا اتأخرت ولازم ارجع
    وساعتها حسيت ان البيت بعيد اوي ومفيش مواصلات وانا حيلي اتهد 😣
    مشينا لحد رمسيس ومن رمسيس لقينا ميكروباصات بس عليها بالضرب
    بس ركبوا الستات الاول ووصلنا لحد شارع الطيران ونزلنا خلاص كدة
    كنت مهدودة بس لازم ارجع البيت !!
    لسه كتير اوي !!
    مشيت في الاوتوستراد لحد مكرم عبيد
    بس قابلت قسم الشرطة اللي عالاوتوستراد ولقيت منظر فظيع
    يجي ٥٠٠ عسكري وظابط شرطة موجهين بنادقهم عليا وانا جاية لوحدي في وشهم ومعرفش ازاي مش هاممني حاجة .
    وصلت لحد عندهم لقيتهم مصممين اني الف من شارع النزهة اروح ناحية مصر الجديدة ..
    😘 افهم فيهم ان بيتي مش هناك وان بيتي في مصطفى النحاس لحد ما واحد فيهم تطوع يمشي معايا لحد ما دخلت مكرم عبيد
    كانت رجلي مش شايلاني فعلا وابتدت تورم وبتطلع بقابيق او فقاقيع من القدم من تحت 😂
    لقيت دبابة حاولت اشاورلهم يقفولي ماشافونيش 😂
    فضلت ماشية لحد ما لقيت عربية سايقها ظابط جيش معدية من جنبي وطبعا مفيش غيرها في الشارع اصلا
    الشوارع فاضية جدا جدا لدرجة ماتتوصفش
    سألته اذا ممكن يوصلني لان مفيش مواصلات لقيته واجل محترم فوق الوصف ركبت ورا ووصلني لخد البيت من غير ما يسألني اي سؤال بس انا شكرته اوي ووصلت عند البيت مش مصدقة نفسي 😂
    طلعت كلمت ماما واخدت الطريحة المتينة من الزعيق ونمت على الارض بهدومي لحد الصبح 😄
    بعد كدة كملت في الثورة لحد اخرها وبقول الحمد لله ان كل دة حصل عشان نفهم حاجات كتير ماكناش فاهمنها كشعب

    التعديل الأخير تم بواسطة عفاف ; 29-01-2017 الساعة 01:43 PM

  4. #14
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,208

    افتراضي





    M.a. Ziedan
    من ضمن مساؤي هذا اليوم عندما اعلن هروب المساجين من سجون وادي النطرون القرية ذُعِرَت لاننا قريبون من هذه السجون وبعض العاملين في مدينة السادات من البلد اخبروا الناس ان المساجين وصلوا لهم ولم يطلبوا الا بعض الطعام وملابس ونقود ليذهبوا الؤ بلادهم ..امافي القرية فقد تولي بعض الشباب من كل ناحية تكوين مجموعات حراسة لكل مداخل القرية وكانت نكت التخطيط الحربي .من المضحكات المبكيات ..لان البلد كلعا منافذ للدخول والخروج .وانطلقت الاشاعات من كل حدب وصوب عن الهاربين وماحدش فاهم حاجة الا ...الاخوان يبدوا انهم كانوا يعرفون مايجري وحجمه ومن يقوم بذلك ...وصديقاي المرحومان سمير فايد واحمد البنا ..كانا يقصان لي مايتم ..بشكل فكاهي وردود افعال الناس ...الله لايعيدها ايام





    التعديل الأخير تم بواسطة عفاف ; 29-01-2017 الساعة 01:46 PM

صفحة 2 من 2 الأولىالأولى 12

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •