بمناسبة مشاكل حصلت مع أصدقاء و معارف كثيرين بخصوص موضوع الضرائب العقارية

لاحظت إن مأمورية الضرائب العقارية فى عدد من المحافظات - إن لم يكن فى عموم الجمهورية - بتحسب الضريبة العقارية بشكل خاطىء كنوع من الاستسهال

يعنى هما عارفين طريقة الحساب الصحيحة لكن بيربطوا بطريقة خاطئة ربما لزيادة حصيلة الضريبة أو جايز كسل منهم

فأنا باكتب البوست ده عشان تفهم الضريبة بتتحسب ازاى وفقا للقانون و ازاى تقدر تتظلم من الربط الخاطىء للضريبة

قيمة الضريبة هى 10 % من صافى القيمة الإيجارية السنوية للعقار

تقدير القيمة الإيجارية له طريقة حساب معقدة بعض الشىء

أول حاجة نص القانون على أن تشكل لجان اسمها لجان الحصر و التقدير لتقدير قيمة العقار السوقية - غالبا لا تشكل هذه اللجان و يتم الربط عشوائيا بمعرفة مأمورية الضرائب -

و من خلال القيمة السوقية نقدر نحدد القيمة الرأسمالية للعقار اللى هى 60 % من القيمة السوقية للعقار

القيمة الإيجارية السنوية للعقار هى 3 % من القيمة الرأسمالية

يخصم من القيمة الإيجارية 30 % مصاريف صيانة بالنسبة للعقارات السنوية و 32 % بالنسبة للعقارات غير السكنية " تجارية - إدارية - مهنية "

الوحدة السكنية الرئيسية تتمتع بحد إعفاء 24 ألف جنيه يخصم من قيمة صافى الأجرة السنوية و تدفع 10 % من الباقى و ده بخصوص الوحدة السكنية الرئيسية للأسرة فلو عندك وحدة ثانية لن تتمتع بحد الإعفاء بالنسبة لها

الوحدة غير السكنية لها حد إعفاء 1200 جنيه

يعنى لو عندك وحدة سكنية واحدة تمنها لا يتجاوز مليون و تسمعمائة ألف جنيه مش هتدفع ضريبة

و لو تمنها اتنين مليون جنيه هتبقى قيمة الضريبة العقارية بالنسبة لها حوالى 120 جنيه

أما لو عندك وحدة ثانية تمنها مليون جنيه هتدفع عنها حوالى 2500 جنيه

لو عندك محل أو عيادة أو مكتب تجارى - أى وحدة غير سكنية - تمنه مليون جنيه هتبقى الضريبة حوالى 1200 جنيه

المفروض بعد ما لجان التقدير تقدر قيمة العقار يتم إخطار الممول بالقيمة المقدرة بخطاب مسجل بعلم الوصول - ده غالبا مبيحصلش -

من حق الممول الطعن على التقدير خلال 60 يوم من تاريخ الإخطار أمام لجان الطعن المبين تشكيلها فى القانون

و يجوز الطعن فى قرار تلك اللجان خلال 60 يوم من تاريخ إخطار الممول بالقرار أمام محكمة القضاء الإدارى

يعاد تقدير قيمة العقار كل خمس سنوات

و لا يجوز أن يزيد التقدير الجديد بأكثر من 35 % من الوحدات السكنية و 45 % بالنسبة للوحدات غير السكنية

ملحوظة : العقارات التى تخضع لقوانين الإيجار القديمة معفاة من الضرائب العقارية

العقارات المخصصة لدور العبادة أو الجمعيات غير الهادفة للربح معفاة من الضريبة