النتائج 1 إلى 3 من 3

الموضوع: في ذكرى رحيل الزعيم

  1. #1
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,214

    افتراضي في ذكرى رحيل الزعيم

    مقتطفات من أقوال الأصدقاء في الفيسبوك

    في ذكرى الزعيم الخالد جمال عبد الناصر وبنص القرآن فإن من علامات الزعامة البسطة في العلم والجسم الاثنين زي ماكان الزعيم الراحل كده

    Ayman Saif











    More Stories
























  2. #2
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,214

    افتراضي

    Nadia AlHamalawy










    كله من خيرك ياناصر .... جملة هنفضل نقولها لحد ما نقابله .. جيلى جيل الستينات ... عاش طفولته فى زمن عبد الناصر داق مرارة الحزن الصادق وجريت دموعه ... ودموع الأطفال مبتكدبش أبداااااااااا يوم 28 سبتمبر كان يوم صعب متلون بلون الحزن الأسود ... مكناش نعرف يعنى ايه سياسة لكن كنا حاسين اننا فقدنا السند وجبل الحنان الى كان محاوطنا فى كل مكان ... كنا بنجرى لما نعرف ان فيه زيارة وهيصاحب ناصر ضيوفه للأهرامات من غير ترتيب للوقفة ولا تدريب التصقيفة كانت بتطلع من القلب قبل الإيد معظمنا بملابسه العادية الى بمريلة المدرسة والى ببيجامة البيت عمرنا ما شعرنا بحرس ولا خوفنا من شكل مسدس ولا أترعبنا من ظابط جنبه ... وكانت عيون الكل بتحرسه
    الله يرحمك ياجمال ............. الله يرحمك ياحبيبى وحبيبنا وحبيب الملايييييييييين ....
    انا فاكرة كأنه النهاردة وانا واقفه قدام باب مدرستى مدرسة الفريق عزيز المصرى الأبتدائية .

  3. #3
    An Oasis Pioneer
    الصورة الرمزية عفاف
    الحالة : عفاف غير متواجد حالياً
    رقم العضوية : 295
    تاريخ التسجيل : Oct 2006
    الدولة : مقيمة بمصر
    المشاركات : 12,214

    افتراضي

    ربيع الحسينى


    حكايه جنازة و

    رساله الى الرئيس جمال عبد الناصر
    سلام عليك سيدى الرئيس
    ياريس النهارده وبعد ان بلغت من العمر ما بلغت .. الا اننى اشعر انى محتاج ان احكى لك عن يوم لم تراه ولم تعرف عنه شيئا .. ف اليوم ده ياريس انا كنت طفل زى كل الاطفال .. لا يعنيه اى شىء ف الدنيا الا اللعب واللهو .. واحيانا المذاكره التى كانت تفرض علي فرضا من والدتى ( خالتى ) وقتها ياريس انا مكنتش اعرف عنك اى حاجه غير انى باشوفك ف التلفزيون الابيض والاسود ..او باسمع حلم وصباح وام كلثوم بيغنوا باسمك ف الراديو ... وصورتك الكبيره الضخمه موجوده ف غرفه ( الصالون) وف المدرسه كان اسمك بابا جمال ..وكانت صورك فى كل المحلات اللى بندخلها .. وف الشوارع على كل الجدران .. حتى لما كنا بنروح السينما القريبه من البيت يوم الجمعه كان لازم اشوفك ف الاخبار اللى كانت بتتعرض قبل الفيلم .. يارجل احببتك وكان حبك بداخلى وارثيا .. ليس من اهلى فقط ولكن كان من كل الشعب ..خلينى احكى لك عن اليوم اللى مشفتوش وانا منسيتهوش .. انا اتربيت فى بيت زى اى بيت مصرى وقتها .. مش اغنيا ولا حاجه ناس بسيطه زى كل الناس .. بنتجمع كلنا ف غرفه واحده مظلمه يتسرب اليها الضوء المنتشر من لمبه الصاله الوحيده توفيرا للكهرباء .. نسمع مع والدى ( زوج خالتى ) قرءان الساعه 8وبعده نشره الاخبار .. كان الحج على بيحب يقعد على كرسى اشتراه من مزاد كان بيتميز ان حجمه كبير ووثير ..الراجل الصعيدى اللى جاء من اقاص الصعيد سعيا وراء لقمه العيش ف الشركه المصريه للملاحه البحريه ..او كااانت شركه عبود باشا .. اللى اتأممت واصبحت الشركه ملك المصريين العاملين بها والمشاركين ف ارباحها .. ايوه يا ريس بعد ما كان بيطفح الدم عشان ملاليم .. بقا بيبقبض مراتب محترم واخر السنه كان له نصيب من ارباح الشركه .وده غير كوبونات الكسوه بتاعه الشتا مره وبتاعه الصيف مره حسب عدد افراد الاسره.. يومها يا ريس طالت فقره تلاوه القرءان .. لم تنقطع يا ريس .. وكان ف الفواصل الاناشيد الوطنيه .. او عزف للموسيقات العسكريه .. كنت صغير بس ملاحظ التوتر اللى شوفته ف عيون والدى ووالدتى .. ومره واحده لقيت والدتى بتقوم من مكانها بعد فتره سكوت طويله وبتبص لاختنا الكبيره سعاد الله يرحمها .. وبتقول لها : جمال جرى له حاجه يا سعاد .. بنبص لبعض ومحدش بينطق .. والحج على بيولع سيجاره من سيجاره.. لحد ما المذيع قال : ايها الساده السيد محمد انور السادات نائب رئيس الجمهوريه يلقى عليكم بيانا هاما ... وسمعته بيقول كلام كتير مستوعبتش منه الا جمله : مات رجل من اشجع الرجال .. مات جمال عبد الناصر .. ياااااااااااااه شنب الحج على بيلعب بيحاول يحوش دموووع .. وغصب عنه هربت من عينه .. عمرى ما شوفت ف عيون الحج على دموع حتى يوم وفاه جدتى والدته .. امى صرخت بعزم ما فيها .واختى سعاد بتصرخ . وفجأه حسيت ان شارعنا كله بيصرخ .. وعلت اصوات الصريخ .. اسكندريه كلها بتصرخ..ف وقت واحد .. رجاله وستات ..واطفال اكبر مننا عارفين قيمه جمال عبد الناصر اكتر مننا .. ابواب الشقق اتفتحت على بعض .. طنط كرامانس وجوزها لويز ف بيتنا بيبكوا .. كل الناس بتحضن بعض وتبكى .. خرجت للشارع لقيت خالى صابرجاى على العجله بتاعته وهو ساكن بعدنا بكام شارع .. جريت عليه محسش بيا .. دخل البيت وانا وراه .. ولقيته رمى نفسه على كرسى وبقا يعيط بصوت عالى .. امى واختى معرفش امتى لحقوا يلبسوا اسود .. كل الناس ف البلكونات لابسين اسود .. هو ايه اللى بيحصل .. ؟؟ استيعابى للموضوع كان ضعيف .. عم جندى البقال قفل محله .. ايه ده؟؟ كل المحلات بتقفل ..كل الناس بتصرخ .. صوت زماره القطارات من محطه مصر القريبه مننا لا تنقطع... وكأن سائقيها يصرخون بها ..محمد وحسن ومصطفى اخواتى ( ولاد خالتى ) واقفين على باب الشارع باصين للسما ..يومها ياريس فى عز الليل امى قررت نجى لك القاهره .. رحنا محطه مصر لقينا كل القطارات اتغير مسارها للقاهره فقط ... يومها يا رييس لقينا عدد الناس الى فوق القطارات اكتر من للى جواها .. يومها ياريس الزحمه ف الشوارع شايله صورتك وكأنه يوم الحشر .. يومها ياريس بس استوعبت اننا ضيعنا .. لما فشلنا نركب اى حاجه توصلنا للقاهره نحضر الجنازه .. .. ورجعنا .. مشيت مع الولاد ف الشارع نهتف ونقول : عاش جمال عبد الناصر والناس يبصوا لنا ويبكوا .. نفسهم يقولوا لنا عبد الناصر مات يا ولاد ومش قادرين ينطقوها .. وكبرت يا ريس .. سنين طويله ذكراك لا تفارقنا .. كبرت يا ريس والنهارده الاقى ناس بتشتمك .. بتحاول تقلل من قدرك .. لانك كنت الشوكه ف ضهر الاستعمار .. بينتقموا منك بعد وفاتك ب 46 سنه .. بينتقموا منك عشان حميتنا من الاخوان المتاسلمين .. بينتقموا منك عشان كنت زعيم للامه العربيه .. والله ما هانت الامه الا بوفاتك فهننا على العالم كله .واهانونا من وضعوا يدهم ف يد امريكا الشيطان الاعظم . . هدموا انجازاتك .. هدموا مشاريعك واحلامك الى كل من يشككنا ف شعبيه جمال عبد الناصر ويقولون كان شعب مقهورمرعوب من ديكتاتور .. اذهبوا الى اليوتيوب وشاهدوا جنازه جمال عبد الناصر ..فهى اعظم استفتاء على شعبيه رجل مات .هل كل الجماهير دى كانت لسه مرعوبه من راجل مات ؟؟ انت كنت عامل لهم ايه عشان يحبوك كل الحب ده ؟؟. واخيرا ياريس رغم مرور 46 سنه من طفولتى بقولها : عاااش جمال عبد الناصر .. عاش جمال عبد الناصر .. عااش جمال عبد الناصر ..

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •